ہم عید میلاد النبی کیوں نہ منائیں ؟

از قلم: محمد عامر حسین مصباحی
رسول گنج عرف کوئلی

دستورِ دنیا ہے کہ نعمتوں کے حصول پر انسان خوشی کا اظہار کرتا ہے۔ اورپھر جیسی نعمت ویسی اظہارِ خوشی بھی ہوتی ہے۔ محسنِ کائنات ، شہنشاہِ عرب وعجم حضور پُر نور ﷺتو اللہ کی نعمتوں میں سب سے بڑی اور عظیم نعمت ہیں جو ہمیں عطا ہوئی، کیوں کہ سوائے جملہ نعمتوں کے اس نعمتِ کبریٰ کی بخشش پر رب عزوجل نے احسان جتایا۔ ارشاد ہے لَقَدْ مَنَّ اللہُ عَلَی الْمُؤمِنِیْنَ اِذْبَعَثَ فِیْھِمْ رَسُوْلاً ترجمہ:مومنوں پر اللہ کا احسان ہوا کہ ان میں انہیں میں کا ایک رسول بھیجا۔

اور ظاہر ہے کہ احسان کسی عظیم شئی کی بخشش و عطا پر جتایا جاتا ہےاسی سے معلوم ہوا اورہر ایک پر عیاں بھی ہے کہ سرکار ﷺ اللہ کی عظیم نعمت ہیں ۔ مگر ماہِ ربیع النور کے آتے ہی جہاں عاشقانِ مصطفیٰ علیہ التحیۃ والثنا کے چہرے کِھل جاتے ہیں اور اپنے گھروں، گلیوں اور شاہراہوں کو سجاتے اور چراغاں کرتے ہیں ، جلسہ و جلوس کی شکل میں اپنے آقا سے اپنی قلبی محبت و مؤدت اور عقیدت کا اظہار کرتے ہیں۔اور کیوں نہ ہوکہ اللہ رب العزت نے ہمارے نبی کو اپنی ذات کا مظہر بنایا ہے، جن کی آمد سے صنم کدۂ جہاں سے کفر والحاد اور شرک کی ظلمتیں مٹیں ، جن کی آمد سے زندہ در گور ہونے والی بچیوں اور مظلموں ، بے کسوں ، بے سہاروں ، یتیموں اور بیواؤں کو سہارا ملا، ظلم وجہالت کی تاریکیوں میں بھٹکنے والوں کو نور کی جگمگاہٹ ملی اور اندھیری رات کے مسافروں کو راہِ ہدایت نصیب ہوئی، ان کی میلادہے پھر بھلا وجہِ مسرت اور کیا چاہیے۔

لیکن ایسے موقع پر کچھ لوگوں کے چہرے اترے اور وہ کبیدہ خاطر ہوتے ہیں اور حتی المقدور کوشش کرتے ہیں کہ دلوں سے جذبۂ عشقِ حضور نکال دیں اور ماہِ ربیع النور کی اہمیت ختم کردیں ۔اور ان کی طرح کوئی بھی ’’ عید میلاد النبی ﷺ ‘‘ نہ منائے، مگر جن کے دلوں میں چراغِ عشقِ نبی روشن ہو،جن کی دھڑکنوں میں مصطفیٰ جانِ رحمت ﷺ بساکرتے ہوں وہ اس دن کو کیسے نظر انداز کرسکتے ہیں جس دن اللہ رب العزت نے اپنی سب سے عظیم نعمت اپنے حبیب کی شکل میں عطا فرمایا۔ عاشقانِ حضور کو ’’ عید میلاد النبی ﷺ‘‘ منانے کے لیے کسی دلیل وحجت کی قطعی حاجت ہی نہیں کہ ان کے نزدیک تو سب سے بڑی دلیل آقائے دوعالم کی آمد ہی ہے، جلنے والے جلیں کیا فرق پڑتا ہے۔

خاک ہوجائیں عدو جل کر مگر ہم تو رضا
دم میں جب تک دم ہے ذکر ان کا سناتے جائیں گے (شعر رضا)

اس کے باوجودمضبوط دلائل و شواہد بھی رکھاکرتے ہیں تاکہ دشمنوں کو اس کارِ خیر پر لب کشائی کی جرأت نہ ہوسکے۔
دلائل کی سماعت سے قبل ہمیں جاننا چاہیے کہ ’’ عید میلاد النبی ‘‘ ہے کیا اور کیوں ہم مناتے ہیں ۔
عید: عید کا لغوی معنیٰ ہے۔’’ جو بار بار آئے‘‘’’مسلمانوں کے جشن کا روز‘‘’’خوشی کا تہوار‘‘ ’’نہایت خوشی‘‘(فیروز اللغات ص:۹۰۸)
اور فیروز اللغات کے مذکورہ صفحہ پر ہی نیچے’’ عید میلاد‘‘ کا معنیٰ یہ درج ہے’’پیغمبرِ اسلام صلی اللہ علیہ وسلم کی ولادت کا دن‘‘
مولود: پیدائش کا دن ، وہ مجلس جس میں حضور پیغمبرِ اسلام ﷺ کی پیدائش کا بیان کیا جائے۔ (فیروز اللغات ص: ۱۳۱۸)
میلاد: ٍ پیدا ہونے کا زمانہ، پیدائش کا وقت، پیدائش ۔ (فیروز اللغات ص: ۱۳۳۲)
میلاد النبی: رسولِ اکرم ﷺ کی پیدائش، حضور صلی اللہ علیہ وسلم کی پیدائش کا دن (فیروز اللغات ص: ۱۳۳۲)
اسی طرح المعجم المفہرس میں ہے کہ میلاد عربی زبان کا لفظ ہے ۔ اس کا مادہ ’’ ولد‘‘ (و ل د ) ہے میلاد عام طور پر اس وقت ولادت کے معنوں میں مستعمل ہے۔ میلاد اسم ظرفِ زمان ہے۔ قرآن مجید میں مادہ ولد کل ۹۳/ مرتبہ آیا ہے اور کلمہ مولود ۳/ مرتبہ آیا ہے۔ (المعجم المفہرس لالفاظ القرآن الکریم ص: ۷۶۴-۷۶۳)
تو ظاہر ہوا کہ عید میلاد النبی کا معنیٰ ہوا نبی ﷺ کی پیدائش کی خوشی۔ اب اگر قرآنِ مقدس کا مطالعہ کریں کہ آیا اس میں کسی کی میلاد کا ذکر ہے یا نہیں ؟یاصحیح معنوں میں میلاد منانا بدعت ہونے کی وجہ سے روک دیا گیا ہے۔تو جونہی قرآنِ مقدس کی پہلے جز کی ورق گردانی شروع کریں گے حضرت آدم علیہ السلام کی میلاد آجائے گی۔ وَاِذْ قَالَ رَبُّکَ لِلْمَلٰئِکَۃِاِنِّی جَاعِلٌ فِی الْاَرْضِ خَلِیْفَۃْ سےشروع ہوکر وَالَّذِیْنَ کَفَرُوْا وَکَذَّبُوْا بِاٰیٰتِنَا اُولٰئِکَ اَصْحٰبُ النَّارِ ھُمْ فِیْھَا خلِدُوْنَ تک حضرت آدم علیہ السلام کی تخلیق کا ذکرِ جمیل اور ساتھ ہی دیگر حالات کا بھی تذکرہ ملتا ہے۔

اور پھر پیدائش کا تفصیلی ذکر اس انداز میں وَاِذْ قَالَ رَبُّکَ لِلْمَلٰئِکَۃِ اِنِّی خَالِقٌ بَشَرًامِّنْ صَلْصَالٍ مِّنْ حَمَاٍ مَّسْنُوْنٍ۰ فَاِذَا سَوَّیْتَہٗ وَنَفَخْتُ فِیْہِ مِنْ رُّوْحِیْ فَقَعُوْا لَہٗ سٰجِدِیْنَ ۰ فَسَجَدَ الْمَلٰئِکَۃُ کُلُّھُمْ اَجْمَعُوْنَ ۰ اِلَّا اِبْلِیْسَ اَبیٰ اَنْ یَّکُوْنَ مَعَ السّٰجِدِیْنَ

ترجمہ کنز الایمان: اوریاد کرو جب تمھارے رب نے فرشتوں سے فرمایا کہ میں آدمی کو بنانے والا ہوں بجتی مٹی سے جو بدبودار سیاہ گارے سے ہے، تو جب اسے ٹھیک کرلوں اور اس میں اپنی طرف کی خاص معزز روح پھونک لوں تو اس کے لیے سجدے میں گر پڑنا، تو جتنے فرشتے تھے سب کے سب سجدے میں گرے سوا ابلیس کے ، اس نے سجدہ والوں کا ساتھ نہ مانا۔(پارہ ۱۴/ رکوع :۲)

سورۂ قصص میں اللہ رب العزت نے حضرت موسیٰ علیہ السلام کی پیدائش،پرورش ، بچپن ،جوانی اور فرعون کے دربار میں جاکر درس توحید و رسالت دینےاور معجزات وغیرہ ہر چیز کا تفصیلی بیان فرمایا۔
اور پھرسورۂ آل عمران میں اللہ رب العزت نے حضرت مریم رضی اللہ عنہا کی پیدائش کا تذکرہ فرمایا۔وَاِذْ قَالَتِ امْرَأَتُ عِمْرٰنَ رَبِّ اِنِّی نَذَرْتُ لَکَ مَافِیْ بَطْنِیْ مُحَرَّرًا فَتَقَبَّلْ مِنِّی اِنَّکَ اَنْتَ السَّمِیْعُ الْعَلِیْمْ۰ فَلَمَّا وَضَعَتْھَا قَالَتْ رَبِّ اِنِّی وَضَعْتُھَا اُنْثیٰ وَاللہُ اَعْلَمُ بِمَا وَضَعَتْ وَلَیْسَ الذَّکَرُ کَالْاُنْثیٰ وَاِنِّی سَمَّیْتُھَا مَرْیَمَ وَاِنِّی اُعِیْذُھَا بِکَ وَ ذُرِّیَّتُھَا مِنَ الشَّیْطٰنِ الرَّجِیْمِترجمہ کنز الایمان : پھر جب اسے جنی بولی اے رب میرے یہ تو میں نے لڑکی جنی اور اللہ کو خوب معلوم ہے جو کچھ وہ جنی اور وہ لڑکا جو اس نے مانگا اس لڑکی سا نہیں ، اور میں نے اس کا نام مریم رکھا اور میں اسے اور اس کی اولاد کو تیری پناہ میں دیتی ہوں راندے ہوئے شیطان سے۔(پارہ ۳ / ص:۵۵ )اس کے علاوہ اس سورت میں حضرت زکریا و یحیٰ علیھما السلام کے تعلق سے بھی تذکرہ ہے۔
پھر اللہ رب العزت نے سورۂ مریم میں حضرت یحیٰ علیہ السلام اور حضرت عیسیٰ علیہ السلام کی ولادت کا مفصل تذکرہ فرمایااور ان کی پیدائش کے تذکرے پر ہی بس نہیں کیا بلکہ حضرت یحیٰ کے متعلق فرمایا’’سلامتی ہو اس دن پر جس دن وہ پیدا کیے گئے ،جس دن وہ وفات پائیں گے اور جس دن زندہ اٹھائے جائیں گے‘‘ پھر حضرت عیسیٰ علیہ السلام کا قول نقل فرمایا’’ وَالسَّلَامُ عَلَیَّ یَوْمَ وُلِدْتُّ وَیَوْمَ اَمُوْتُ وَیَوْمَ اُبْعَثُ حَیًّا‘‘ترجمہ: اور سلامتی ہو مجھ پر جس دن میں پیدا ہوا ، اورجس دن میں مروں گا اور جس دن زندہ اٹھایا جاؤں گا۔
اور تعجب تو یہ ہے کہ ان آیتوں کی نہ تو تلاوت منسوخ ہے اور نہ ہی حکم منسوخ گویا آج تک حضرت یحیٰ و عیسیٰ کی پیدائش کے دن پر سلامتی ہی سلامتی ہے تو پھر نبی الانبیا اور سید الانبیا کی پیدائش کا دن سلامتی کا دن کیوں نہ ہوگا؟ ان آیات سے یہی ثابت ہوا کہ میلاد النبی کے دن حضور پر سلام ، حضور کی پیدائش کے دن پر بھی سلام بھیجا جاسکتا ہے۔ اور یہی تو ہمیں امام احمد رضا نے سکھایاہے۔
مصطفیٰ جانِ رحمت پہ لاکھوں سلام
شمعِ بزمِ ہدایت پہ لاکھوں سلام
جس سہانی گھڑی چمکا طیبہ کا چاند
اس دل افروز ساعت پہ لاکھوں سلام
سورۂ یوسف میں اللہ رب العزت نے حضرت یوسف علیہ السلام کے بچپن ، جوانی ، قید و بند ، بادشاہت اور آزمائش وغیرہ کا تذکرہ فرمایا۔ ان کے علاوہ دیگر انبیاء علیھم السلام کی میلاد، ان کے تذکرےجابجا قرآنِ مقدس میں ملتے ہیں تو جب ان انبیاء علیھم السلام ودیگر انبیاکی میلاد خود اللہ رب العزت نے بیان فرمائی پھر ہم ان نبیوں کے سردار، نبی الانبیاء، سید الانبیاءصلی اللہ علیہ وسلم کی میلاد کیوں نہ منائیں کیوں نہ آمدِ سرکار پر خوشیاں منائی جائیں ؟
نثار تیری چہل پر ہزاروں عیدیں ربیع الاول
سوائے ابلیس کے جہاں میں سبھی تو خوشیاں منارہے ہیں
جیسا کہ یہ بات ثابت ہوئی کہ میلاد نبیٔ پاک ﷺ کی پیدائش یا دنیا میں مبعوث ہونے کے تذکرہ کو کہتے ہیں اور جب ایسی بات ہےتو اللہ رب العزت نے انبیاء علیھم السلام کی مقدس ارواح کی موجودگی میں نبی کی میلاد کا تذکرہ فرمایا۔ چنانچہ ارشاد ہے۔ وَاِذْاَخَذَاللہُ مِیْثَاقَ النَّبِیّٖنَ لَمَآ اٰتَیْتُکُمْ مِّنْ کِتٰبٍ وَّ حِکْمَۃٍ ثُمَّ جَآءَکُمْ رَسُوْلٌ مُّصَدِّقٌ لِّمَا مَعَکُمْ لَتُوْمِنُنَّ بِہٖ وَلَتَنْصُرُنَّہٗ قَالَ ءَاَقْرَرْتُمْ وَاَخَذْتُمْ عَلیٰ ذٰلِکُمْ اِصْرِیْ قَالُوْا اَقْرَرْنَا قَالَ فَاشْھَدُوْا وَاَنَا مَعَکُمْ مِّنَ الشّٰھِدِیْنَ

ترجمۂ کنز الایمان: اور یاد کرو جب اللہ نے پیغمبروں سے ان کا عہد لیا جو میں تم کو کتاب اور حکمت دوں گا پھر تشریف لائے تمھارے پاس و ہ رسول کہ تمہاری کتابوں کی تصدیق فرمائے تو تم ضرور ضرور اس پر ایمان لانا اور ضرور ضرور اس کی مدد کرنا فرمایا کیوں تم نے اقرار کیا اور اس پر میرا بھاری ذمہ لیا ؟ سب نے عرض کی ہم نے اقرار کیا فرمایا تو ایک دوسرے پر گواہ ہوجاؤ اور میں آپ تمھارے ساتھ گواہوں میں ہوں ۔ (پارہ :۳/ ص: ۶۱)
اس آیتِ کریمہ میں اللہ رب العزت نے سرکارِ مدینہ ﷺ کی بعثت کا تذکرہ فرماکر تما م انبیاء ومرسلین کو ان پرایمان لانے اور ان کی مدد کرنے کا پابند بنایا۔ تو معلوم ہوا کہ حضور کی میلاد یعنی آپ ﷺ کی پیدائش کا تذکرہ کرنا اللہ رب العزت کی سنت اور سننا انبیاء ومرسلین کی سنت پھر ہم کیوں نہ میلاد منائیں ؟
تمام انبیاء نے حضور کی میلاد یعنی آپ کی پیدائش کی خوشخبری اپنی اپنی امت کو دی جس میں حضرت عیسیٰ علیہ السلام کا تذکرہ قرآن میں بھی ملتا ہے۔ وَاِذْ قَالَ عِیْسَی ابْنُ مَرْیَمَ یٰبَنِیْ اِسْرَآءِیْلَ اِنِّیْ رَسُوْلُ اللہِ اِلَیْکُمْ مُّصَدِّقًا لِّمَا بَیْنَ یَدَیَّ مِنَ التَّوْرٰۃِ وَ مُبَشِّرًا بِرَسُوْلٍ یَّاتِیْ مِنْ بَعْدِ ی اسْمُہٗ اَحْمَدْ
ترجمہ: اور یاد کرو جب عیسیٰ ابن مریم نے کہا اے بنی اسرائیل میں تمہاری طرف اللہ کا رسول ہوں ، اپنے سے پہلی کتاب توریت کی تصدیق کرتا ہوا، اور ان رسول کی بشارت سناتا ہوا جو میرے بعد تشریف لائیں گے ان کا نام احمد ہے۔ (پارہ ۲۸/ سورہ ٔ صف )
یعنی میرے آقا کی میلاد منانا اور آپ ﷺ کی آ مد بہت پہلے آنے کی خوشخبری سناناحضرت عیسیٰ علیہ السلام کی بھی سنت ہے۔ اور لطف تو یہ ہے کہ اللہ رب العزت نے قرآن میں ان کا قول نقل فرمایا اور یہ فرمایا کہ ’’ یاد کرو‘‘ اب جب جب قرآن کی اس آیتِ کریمہ کی تلاوت ہوگی رسول اللہ ﷺ کی میلاد یاد دلائی جاتی رہے گی ۔ پھر ہم کیوں نہ میلاد منائیں ؟
اللہ رب العزت نے ہمیں اس کی نعمتوں ، رحمتوں اور فضل وکرم کے حصول پرخوشیاں منانے کا حکم دیا ہے۔ قُلْ بِفَضْلِ اللہِ وَبِرَحْمَتِہٖ فَبِذٰلِکَ فَلْیَفْرَحُوْا ھُوَ خَیْرٌ مِّمَّا یَجْمَعُوْنَترجمہ: تم فرماؤ اللہ ہی کے فضل اور اسی کی رحمت اور اسی پر چاہیے کہ خوشی کریں۔ (پارہ ۱۱/ سورۂ یونس )
اللہ کی نعمتیں ، رحمتیں اور اس کا فضل کس قدر ہے اس کا کوئی شمار کرنا چاہے تو ممکن ہی نہیں ہے اور ان تمام نعمتوں اور رحمتوں میں سب سے بڑی نعمت و رحمت ہمارے آقا صلی اللہ علیہ وسلم ہیں کہ تمام نعمتیں اور فضل وکرم اِ سی ایک نعمت کے صدقے میں ہیں تو کیوں نہ سب سے بڑی نعمت کے حصول پر خوب خوشیاں منائی جائیں۔اللہ کے رسول ہمارے پیارے آقا ﷺ نے خود اپنی پیدائش کی خوشی میں روزے رکھے بلکہ جب جب وہ دن آتا روزہ رکھتے ۔
حدیثِ پاک میں ہے’’ اَنَّ رَسُوْلَ اللہِ صَلَّی اللہُ عَلَیْہِ وَسَلَّمْ سُئِلَ عَنْ صَوْمِ یَوْمِ الْاِثْنَیْنِ ؟ قَالَ ذَاکَ یَوْمٌ وُلِدْتُ فِیْہِ وَیَوْمٌ بُعِثْتُ اَوْ اُنْزِلَ عَلَیَّ فِیْہِ ‘‘(صحیح مسلم کتاب الصوم باب استحباب صیام ثلٰثۃ ایام)
حضور نبی اکرم ﷺ سے پیر کے دن روزہ رکھنے کے بارے میں سوال کیا گیا تو آپ صلی اللہ علیہ وسلم نے فرمایا اسی روز میری ولادت ہوئی اور اسی روز میری بعثت ہوئی اوراسی روز میرے اوپر قرآن نازل کیا گیا۔آج تو لوگ سال میں ایک مرتبہ عید میلاد النبی منائے جانے پر اس قدر واویلا مچاتے ہیں مگر پیارے آقا ﷺ نے تو ہر پیر کے روز اپنی ولادت کی خوشی میں روزے رکھے ہیں ۔ پھر ہم کیوں نہ میلاد منائیں اور اسی طرح صحابۂ کرام نے بھی اپنے آقا ﷺ کی پیدائش کی خوشی میں اللہ عزوجل کا شکر ادا کیا اور محفل منعقد کی چنانچہ امام بخاری کے استاد امام احمد بن حنبل لکھتے ہیں ، سیدنا امیر معاویہ رضی اللہ عنہ فرماتے ہیں ایک دفعہ رسول اللہ ﷺ کا اپنے اصحاب کے ایک حلقہ سے گزر ہوا آپ ﷺ نے فرمایا مااجلسکم تم یہاں کیوں بیٹھے ہو؟ انھوں نے کہا جلسنا ندعوا اللہ ونحمدہ علیٰ ماھدانا لدینہ ومن علینا بک ہم اللہ عزوجل کا ذکر کرنے اور اس نے جو اسلام کی ہدایت دی اس پر اس کی حمد و ثنا بیان کرنے اور اس نے آپ ﷺ کو بھیج کر ہم پر جو احسان کیا اس کا ذکر کرنے کے لیے یہ جلسہ منعقد کیا ہے ۔ آپ نے فرمایا آللہ مااجلسکم الا ذالک بخدا تم صرف اسی وجہ سے بیٹھے ہو ؟ صحابہ نے عرض کیا آللہ ما اجلسنا الا بذالک آپ نے فرمایا اما انی لم استحلفکم تھمۃ لکم وانما اتانی جبریل علیہ السلام فاخبرنی ان اللہ عزوجل یباھی بکم الملٰئکۃمیں نے کسی بدگمانی کی وجہ سے تم سے قسم نہیں لی لیکن ابھی جبرئیل آئے تھے اور انھوں نے مجھے بتایا کہ اللہ عزوجل تمھاری وجہ سے فرشتوں میں فخر فرمارہا ہے۔ (نسائی جلد ۲/ ص: ۳۱۰)

اسی طرح احادیث کی کتابوں میں بہت زیادہ احادیث ہیں کہ صحابۂ کرام کے مجمع یا ان کی مجلس میں اللہ کے رسول ﷺ نے اپنی پیدائش ، اپنی خاندانی وجاہت، اور اپنی عزو شرف کا تذکرہ فرمایا۔اس تناظر میں بھی ایک حدیثِ پاک پیش ہے۔

وعن ابن عباس قال: جلس ناس من اصحاب رسول اللہ صلی اللہ علیہ وسلم فخرج حتیٰ اذا دنا منھم سمعھم یتذاکرون قال بعضھم : ان اللہ اتخذ ابراہیم خلیلا وقال آخر: موسیٰ کلمہ اللہ تکلیما وقال آخر: فعیسیٰ کلمۃ اللہ و روحہ، وقال آخر : آدم اصطفاہ اللہ فخرج رسول اللہ صلی اللہ علیہ وسلم وقال:(وقال سمعت کلامکم و عجبکم ان ابراہیم خلیل اللہ وھو کذالک و آدم اصطفاہ اللہ وھو کذالک الا وانا حبیب اللہ ولا فخر وانا حامل لواء الحمد یوم القیمامۃ تحتہ آدم فمن دونہ ولا فخر وانا اول شافع واول مشفع یوم القیامۃ ولا فخر وانا اول من یحرک حلق الجنۃ فیفتح اللہ لی فیدخلنیھا ومعی فقراء المؤمنین ولا فخر وانا اکرم الاولین والآخرین علی اللہ ولا فخر روایت ہے حضرت عبداللہ ابن عباس رضی اللہ عنھما سے فرماتے ہیں کہ اللہ کے رسول ﷺ کے صحابہ میں کچھ لوگ بیٹھے پھر حضور انور ﷺتشریف لائے حتیٰ کہ ان حضرات سے قریب ہوگئے تو انہیں کچھ تذکرہ کرتے سنا ان میں سے بعض نے کہا کہ اللہ نے حضرت ابراہیم کو اپنا دوست بنایا، دوسرے نے کہا کہ اللہ نے حضرت موسیٰ سے کلام فرمایا، ایک اور صاحب بولے کہ حضرت عیسیٰ علیہ السلام اللہ کا کلمہ اور اس کی روح ہیں ، ایک دوسرے نے کہا آدم کو اللہ نے برگزیدہ کرلیا۔ تب ان کے پاس اللہ کے رسول صلی اللہ علیہ وسلم تشریف لائے اور فرمایا کہ ہم نے تمھاری گفتگو اور تمہارا تعجب کرنا سنا یقیناً ابراہیم اللہ کے خلیل ہیں اور وہ ایسے ہی ہیں اور آدم علیہ السلام کو اللہ نے چن لیا واقعی وہ ایسے ہی ہیں مگر یاد رکھو کہ میں اللہ کا محبوب ہوں ، فخریہ نہیں کہتا، قیامت کے دن حمد کا جھنڈا میں ہی اٹھائے ہوئے ہوں گا جس کے نیچے آدم اور ان کے سوا ہوں گے فخریہ نہیں کہتا، میں پہلا شفاعت کرنے والا اور پہلا مقبول الشفاعت قیامت کے دن میں ہوں گا اور فخریہ نہیں کہتا، میں پہلا و ہ شخص ہوں جو جنت کی زنجیر ہلائےگا تب اللہ کھولے گا پھر اس میں مجھے داخل کرے گا میرے ساتھ فقرا مسلمان ہوں گے فخریہ نہیں کہتا میں سارے اگلے پچھلوں میں اللہ کے نزدیک عزت والا ہوں فخریہ نہیں کہتا۔(مشکوٰۃ المصابیح باب فضائل سیدالمرسلین ص: ۵۱۳)
سبحان اللہ ! اللہ کے پیارے رسول ﷺ نے صحابہ کے مجمع میں اپنا ذکرِ جمیل فرمایا اور صحابۂ کرام نے دیگر انبیا و مرسلین کا ذکر فرمایا تو آپ ﷺ نے ان کی تائیدو توثیق فرمائی اور ساتھ ہی بتادیا کہ سب کے مراتب اپنی جگہ ہیں مگر میں اللہ کا محبوب ہوں اور مجھ سے بڑا مرتبہ کسی کا نہیں۔ خواہ ماہِ ربیع الاول میں یہ تذکرے کریں یا کسی اور مہینے میں ہے تو آقا ﷺ کی تعریف و توصیف اور ان کی مدحت سرائی ہی نہ ؟ تو جب اللہ کے رسول ﷺ نے صحابہ کی مقدس جماعت میں اپنی میلاد منایا پھر ہم کیوں نہ میلاد منائیں؟
کچھ لوگوں کو میلاد سے کوئی دقت نہیں بس ’’ عید‘‘ سے ہے کہ میلاد النبی تک تو ٹھیک ہے لیکن یہ عید کیوں ؟ عید تو دو ہی ہیں یہ تیسری عید کہاں سے آگئی؟ تو ملاحظہ ہو۔عَنِ ابْنِ عَبَّاسٍ قَالَ: قَالَ رَسُوْلُ اللہِ صَلَّی اللہُ عَلَیْہِ وَسَلَّمْ اِنَّ ھٰذَا یَوْمُ عِیْدٍ جَعَلَہُ اللہُ لِلْمُسْلِمِیْنَ فَمَنْ جَاءَ اِلیٰ الْجُمُعَۃِ فَلْیَغْتَسِلْ ، وَاِنْ کَانَ طِیْبٌ فَلْیَمَسَّ مِنْہُ، وَعَلَیْکُمْ بِالسَّوَاکِ رسول اللہ ﷺنے ارشاد فرمایا : اللہ رب العزت نے جمعہ کےدن کو تمہارے لیے عید کا دن بنایا ہے، جو شخص نمازِ جمعہ کے لیے آئے اسے چاہیے کہ غسل کرلے اور اگر ہوسکے تو خوشبو لگائے اور مسواک کا ضرور اہتمام کرے۔(سنن ابن ماجہ : رقم الحدیث ۱۰۹۸)
معلوم ہوا کہ عیدیں صرف دو ہی نہیں بلکہ مہینے میں مسلمانوں کے لیے چار عیدیں آتی ہیں اور سال میں یہ عیدیں ۴۸/ ہوجاتی ہیں اور عیدالفطر اور عید الاضحیٰ ملا کر سال میں کل پچاس عیدیں ہوجاتی ہیں ۔
اور حضرت عیسیٰ علیہ السلام نے رب کی بارگاہ میں دعا کی اَللّٰھُمَّ رَبَّنَا اَنْزِلْ عَلَیْنَا مَائِدَۃً مِّنَ السَّمَاءِ تَکُوْنُ لَنَا عِیْدً ا لِّاَوَّلِنَا وَآخِرِنَا وَآیَۃً مِّنْکَ ترجمہ: اے اللہ اے ہمارے رب ! ہم پر آسمان سے ایک خوان اتار کہ وہ ہمارے لیے عید ہو ہمارے اگلے، پچھلوں کی اور تیری طرف سے نشانی (پارہ ۷/ سورہ مائدہ)
معلوم ہوا کہ کسی عظیم نعمت کے حصول کے دن کو ’’ عید‘‘ بنانا ایک نبی کی سنت ہے۔ اور حضرت عیسیٰ علیہ السلام نے یہ نہیں کہا ہمارے لیے عید ہو بلکہ کہا اگلے پچھلوں کے لیے بھی اب بعد میں آنے والے لوگ اس دن کو کیسے پاسکتے ہیں جس دن آسمانی نعمت حاصل ہوئی تو ظاہر سی بات ہے کہ اس دن کی یاد ہی منائیں گے نہ

جب ایک نعمت کے حصول کے دن کو عید بنایا جاسکتا ہے تو وہ دن جو تمام نعمتوں کے حصول کا ذریعہ و وسیلہ ہے ، جس دن اللہ کی سب سے بڑی نعمت ملی کیا اس دن کی یاد ہم نہ منائیں ؟ یقیناً عاشقانِ رسول کا طریقہ ہے اور رہے گا کہ جب جب وہ دن آیا جس دن میں ہمارے آقا ﷺ کی بعثت ہوئی انھوں نے مختلف طریقوں اور جداگانہ انداز میں خوشیوں کا اہتمام کیا ،اور ان شاء اللہ کرتے ہی رہیں گے ۔
حشر تک ڈالیں گے ہم پیدائش مولیٰ کی دھوم
مثلِ فارس نجد کے قلعے گراتے جائیں گے
خاک ہوجائیں عدو جل کر مگر ہم تو رضا
دم میں جب تک دم ہے ذکر ان کا سناتے جائیں گے

الرضا نیٹورک کا اینڈرائید ایپ (Android App) پلے اسٹور پر بھی دستیاب !

الرضا نیٹورک کا موبائل ایپ کوگوگل پلے اسٹورسے ڈاؤن لوڈ کرنے کے لیے یہاں کلک کریں۔
الرضا نیٹورک کا واٹس ایپ گروپ جوائن کرنے کے لیے یہاں پر کلک کریں۔
الرضا نیٹورک کا فیس بک پیج لائک کرنے کے لیے یہاں کلک کریں۔
الرضا نیٹورک کا ٹیلی گرام گروپ جوائن کرنے کے لیے یہاں پر کلک کریں
الرضانیٹورک کا انسٹا گرام پیج فالوکرنے کے لیے یہاں کلک کریں