مسلم تھنک ٹینکس:اہمیت اور تقاضے(2)

Muslim-think-Tanks

مشتاق نوری
6202613656

آکسفورڈ ڈکشنری میں تھنک ٹینک کا مفہوم کچھ اس طرح ہے
A body of experts providing advices and ideas on specific political or economic problems.

یعنی ماہرین کی ایک ایسی ورکنگ باڈی جو مخصوص سیاسی و معاشی مسائل پر حتمی مشورے و ٹھوس نظریے فراہم کرے اسے تھنک ٹینک کہتے ہیں۔

اپنے وقت میں دنیا کی سب سے پیاری اور بڑی زبان رہنے والی عربی جو کہ الہامی زبان کی حیثیت بھی رکھتی ہے، میں تھنک ٹینک کے لیے کئی متبادل الفاظ ملتے ہیں۔خزّان التفکیر، موسسۃُٗ فکریۃُٗ، بوتقۃُ الفکرِ، فریقُ تفکیرِِ، مرکزُ بحوثِِ، حلقۃ فکرِِ وغیرہ۔میری محدود معلومات کے مطابق بطور متبادل موسسۃ فکریۃ، خزان التفکیر کا استعمال اصح ہے۔

تھنک ٹینک کو جدید و سہل ترین مثالوں سے اس طرح سمجھا جا سکتا ہے کہ کرکٹ میں ایک گیند باز بطور کھلاڑی صرف بالنگ پہ توجہ دیتا ہے۔مگر بلے باز کو کیسے آؤٹ کرنا ہے،کب آؤٹ کرنا ہے،گیم کیسے اپنے پالے میں رکھنا ہے۔کب کونسی گیند ڈالنی ہے یہ سوچنا تھنک ٹینک کا کام ہے۔یہ ٹینک باریکی سے بلے بازوں کی کمزوری کا مطالعہ کرتا ہے پھر بالر کو اسی گیند کی پریکٹس کرواتا ہے۔اور رزلٹ %90 موافق آتا ہے۔جس ٹیم کا تھنک ٹینک جتنا موثر ہوتا ہے اس کی کامیابی کے چانسیز بھی اتنے ہی زیادہ ہوتے ہیں۔
تھنک ٹینکس کی اہمیت کا اندازہ اس سے بھی لگایا جا سکتا ہے کہ امریکہ جیسا سپر پاور ملک اپنے سارے معاملات، خارجہ و داخلہ پالیسیاں تھنک ٹینک کی تحقیق و تجزیہ کے پابند رہ کر ہی وضع کرتا ہے۔اسے تھنک ٹینک جیسے اہم شعبے کا بانی ہونے کا شرف بھی حاصل ہے۔

لگ بھگ دو صدی قبل ۱۸۲۴ میں فرینکلین انسٹیٹیوٹ (Franklin Institute) نام سے سب سے پہلا تھنک ٹینک امریکہ میں وجود میں آیا۔۱۸۳۱ میں The Royal United institute کے نام سے دنیا کا دوسرا اور برطانیہ کا پہلا تھنک ٹینک وجود میں آیا۔دوسری عالمی جنگ (1939-1945) سے قبل تک ریاستہاۓ متحدہ امریکہ (USA)اور یو کے میں تھنک ٹینک کا فعال وجود کافی نتیجہ خیز ثابت ہوچکا تھا۔انہی کی گائڈ لائن کے مطابق دونوں ملکوں نے کام بھی کیا۔
مگر حیرت انگیز بات یہ رہی کہ دنیا کا دوسرا بڑا حصہ طویل عرصے تک اس کی افادیت و اہمیت سے بالکل بے خبر رہا۔بلکہ دوسری عالمی جنگ کے بعد کچھ ملکوں نے اس جانب توجہ دی۔جیسے جیسے دنیا کی آنکھ کھلی دیگر ممالک نے بھی اپنی ریاست و اقتدار کے رکھ رکھاؤ کے لئے قومی و عالمی سطح کے پالیسی ساز ادارے کی مکمل انہماک و توجہ کے ساتھ سرپرستی کرنا شروع کر دی۔اور آج معاملہ ایں جا رسید کہ اس وقت تقریبا چھوٹے بڑے دو سو ممالک میں تھنک ٹینکس پاۓ جاتے ہیں۔جو اپنی اہمیت بتانے کے لئے کافی ہیں۔

پوری دنیا میں تقریبا ساڑھے سات ہزار تھنک ٹینکس کام کر رہے ہیں۔ان میں کچھ براہ راست طور پر سیاسی اِشوز پر اثرانداز ہوتے ہیں۔سب کی اپنی اپنی فیلڈ ہوتی ہے۔اسی لیے دنیا بھر میں ہزاروں ٹینکس وجود میں آچکے ہیں۔ایک اکیلے امریکہ میں کل تعداد کی ۲۷% یعنی ۱۸۷۱ تھنک ٹینکس متحرک ہیں۔۲۰۱۸ کی ایک رپورٹ کے مطابق اس وقت انڈیا ۵۰۹؍ تھنک ٹینکس کے ساتھ دوسرے نمبر پر براجمان ہے۔جب کہ آزادی سے قبل اس کے پاس ایسا کوئی ادارہ نہیں تھا۔اتنی قلیل مدت میں سرکار اور ہندوتو لابیز کی سرپرستی میں اتنے تھنک ٹینکس وجود میں آجانا بڑی حصولیابی ہے اور حیرت انگیز بھی۔چائنا ۵۰۷؍ کی تعداد کے ساتھ تیسرے اور یو کے ۳۰۲ کے ساتھ چوتھے پائدان پر ہے۔

ہمارے لئے پریشان کن بات ہے کہ ملک میں جتنے بھی تھنک ٹینکس ہیں ان کے اعلی عہدوں پر آر ایس ایس کے لوگ قابض ہوچکے ہیں۔اب یہ ملک و قوم کی ترقی و تعمیر کے لئے نہیں بلکہ ایک مخصوص نظریہ کو پورے دیش پر مسلط کرنے کے لئے کام کر رہے ہیں۔اس سیکولر اسٹیٹ میں ہندو سوپریمیسی کے لئے سارا زور صرف کرنا ملک کو پیچھے دھکیلنے جیسا ہے۔جو اپنے آپ میں بہت بڑا جرم ہے۔دیش میں جو کچھ بھی ہورہا ہے اس کے پیچھے انہی تھنک ٹینکس کی سوچ کارفرما ہے۔اپنے ایجنڈے کو لاگو کرنے کے لیے سنگھ نے بڑی محنت اور چالاکی سے سارے اونچے عہدوں پر اپنے ادمی بٹھا دیئے ہیں۔

۵؍اگست ۲۰۱۹ کو کشمیر میں مکمل لاک ڈاؤن (ایسا لاک ڈاؤن نہیں جو ہم اور آپ نے جھیلا ہے۔کشمیر کا طویل مدتی لاک ڈاؤن مکمل ڈٹینشن پیریڈ ہی تھا)کر دیا گیا۔معتبر ذرائع سے ملی خبر کے مطابق لاک ڈاؤن سے کچھ ہی دن پہلے قومی سلامتی کے مشیر (NSA) مسٹر اجیت ڈوبھال اپنی پوری لابی کے ساتھ ایک ماہ کا اسپین دورہ کر آۓ تھے۔اگرچہ یہ سرکاری دورہ تھا مگر پس پردہ کچھ اور ہی مقصد تھا۔جب کہ اسپین کے ساتھ ہمارے کوئی خاصے تجارتی یا ثقافتی تعلقات بھی نہیں ہیں۔پھر پاکستان اور انڈیا کے مابین فوجی جھڑپیں،سرجیکل اسٹرائک،پھر ایئر اسٹرائک،ملک میں چائنا کے خلاف ماحول سازی اور پس پردہ ان سے قرضے لینا اس سے تجارتی تعلقات بحال رکھنا یہ سب دفاعی و سیکیورٹی تھنک ٹینکس کے کارنامے ہیں۔ہماری عوام ایسے مسائل سمجھ نہیں سکتی بلکہ خواص کو بھی یہ در پردہ وضع کیے گئے سیاسی مسائل بمشکل سمجھ میں آتے ہیں۔

دنیا میں جتنے بھی بڑے بزینیس مین ہیں بل گیٹس،وارین بفیٹ، جیف بوزیز، اڈانی ،امبانی ،عظیم پریم وغیرہم سب کے پاس بڑے بڑے پالیسی ساز ادارے ہیں۔سب کے اپنے تھنک ٹینکس ہیں جو ان کی کمپنی کی ترقی کے لئے ہمہ وقت کام کرتے ہیں۔جو دن رات متعلقہ سبجیکٹ پر ریسرچ کر رہے ہیں۔
آج وزیر اعظم مسٹر مودی کم پڑھا لکھا بلکہ ناکافی تعلیم کے باوجود سیاست میں اتنے مقبول اس لئے ہے کہ ملک کے سارے تھنک ٹینکس کو اس نے اپنے کام پر لگا رکھا ہے۔یہ ٹینکس اپنی ساری انرجی لگا کے اس کے لئے ماحول ساز میٹیریل تلاش بھی کرتے ہیں اور پھیلاتے بھی ہیں۔یہی وجہ ہے کہ آج کے ڈیٹ میں ایک کامیاب سیاست دان کے بطور جانا جاتا ہے۔دیش کے اندر ہماری لاکھ مخالفت کے باوجود مسلم ممالک خاص کر مشرق وسطی کے سربراہان کے ساتھ ان کے دوستانہ تعلقات استوار ہیں۔انہیں اعزازات سے نوازا جاتا۔

آج عالمی سیاست میں مسلم ممالک اسی لئے پیچھے چھوٹ رہے ہیں کہ ان کے پاس اب تک بہتر اور مؤثر پالیسی سازی کا کوئی منشور نہیں ہے۔ ایسا کوئی ادارہ نہیں ہے۔او آئی سی کے ممبر ممالک میں تھنک ٹینکس تو ہیں مگر اتنے مؤثر اور کارگر نہیں۔یہی وجہ ہے کہ عالمی درجہ بندی میں مسلم ممالک پچھڑ جاتے ہیں۔کیوںکہ تھنک ٹینکس کی مرتب کی گئی تحقیق و ریسرچ کی بنیاد پر ریاستیں اپنی پالیسی طے کرتی ہیں۔اور مسلم ممالک کے تھنک ٹینکس نے اب تک بہت خراب مظاہرہ کیا ہے۔

یہ جدید دور ہے اس میں اب جنگیں ہتھیاروں سے کم، نظریات و پالیسیز سے زیادہ لڑی جائیں گی۔ایک ملک دوسرے کو نیچا دکھانے کے لئے اسلحوں، بارودوں،میزائلوں کے بجاۓ غیر مرئی جنگ کا راستہ اختیار کرے گا۔آپ اسے یوں بھی سمجھ سکتے ہیں کہ آج دنیا کے بڑے بڑے ممالک جن میں امریک سر فہرست ہے، کا دعوی ہے کہ چائنا نے اپنے حریف ملکوں کو کمزور کرنے کے لئے بایولاجیکل ویپن کے ذریعے وائرولوجیکل اٹیک کیا ہے۔یہ کورونا جو اسی کے ایکسپیریمنٹل لیب (Research labs)میں تیار کیا گیا اور دنیا بھر میں پھیلایا گیا ہے۔اگر اس بات میں سچائی ہے تو ماننا پڑے گا کہ چین کا ایک موثر تھنک ٹینک عرصے سے اسی سبجیکٹ پر کام کر رہا ہے۔اور یہ عالمی وجود کے لئے خطرے کا الارم ہے۔اور چین کے لئے بہت بڑی کامیابی۔اسے چینی تکنیکی و سائنسی اداروں کے ساتھ اس کے تھنک ٹینکس کی کامیابی کہا جاۓ گا۔

مشتاق نوری
۲۷؍جنوری ۲۰۲۱ء

الرضا نیٹورک کا اینڈرائید ایپ (Android App) پلے اسٹور پر بھی دستیاب !

الرضا نیٹورک کا موبائل ایپ کوگوگل پلے اسٹورسے ڈاؤن لوڈ کرنے کے لیے یہاں کلک کریں۔
الرضا نیٹورک کا واٹس ایپ گروپ جوائن کرنے کے لیے یہاں پر کلک کریں۔
الرضا نیٹورک کا فیس بک پیج لائک کرنے کے لیے یہاں کلک کریں۔
الرضا نیٹورک کا ٹیلی گرام گروپ جوائن کرنے کے لیے یہاں پر کلک کریں۔
الرضانیٹورک کا انسٹا گرام پیج فالوکرنے کے لیے یہاں کلک کریں۔