کرناٹک: ایک شخص کو دوسری برادری کی نابالغ لڑکی سے بات کرنے پر لوگوں نے مارا پیٹا۔

پولیس کے مطابق اس شخص کی شناخت حفید کے نام سے ہوئی ہے جس کی سماجی رابطے کی ویب سائٹ انسٹاگرام پر لڑکی سے تعارف ہوا تھا۔ اس معاملے میں دو الگ الگ ایف آئی آر درج کی گئی ہیں۔

دکشینا کنڑ کے پولیس سپرنٹنڈنٹ رشیکیش سوناونے نے کہا، "متاثرہ کی شکایت کی بنیاد پر، آئی پی سی کی دفعہ 323، 324، 307، 365، 143، 147 اور 149 کے تحت سبرامنیا پولیس اسٹیشن میں مقدمہ درج کیا گیا ہے۔”

پولیس نے کہا، "لڑکی کے والد نے ایک اور شکایت درج کرائی ہے۔ اس نے مذکورہ شخص پر اپنی نابالغ بیٹی کے ساتھ جنسی زیادتی کا الزام لگایا ہے۔” نابالغ لڑکی کے والد نے شکایت میں الزام عائد کیا ہے کہ حفید نے ان کی بیٹی کو محبت کرنے پر مجبور کیا اور اس کے ساتھ جنسی زیادتی کی کوشش کی۔

لڑکی کے والد نے دعویٰ کیا کہ ان کی بیٹی نابالغ ہے اور اس کی ملاقات حفید سے سبرامنیا کے بس اسٹینڈ پر ہوئی تھی۔ وہاں اس نے اس سے اس کا فون نمبر پوچھا۔ لڑکی کے والد نے الزام لگایا کہ جب اس نے اپنا نمبر دینے سے انکار کیا تو حفید نے اسے پکڑ لیا اور اس پر حملہ کرنے کی کوشش کی۔

دکشینا کنڑ کے پولیس سپرنٹنڈنٹ رشیکیش سوناونے نے کہا، "حفید کے خلاف POCSO اور IPC 354 (B)، 506 کے تحت مقدمہ درج کیا گیا ہے۔” پولیس کے مطابق نوجوانوں کا ایک گروپ حفید کو بس اسٹینڈ سے الگ تھلگ جگہ لے گیا اور وہاں اس کی پٹائی کی۔