تلنگانہ پولیس کا دعویٰ کہ موجودہ سال میں انسداد بغاوت آپریشنز کامیاب رہے

انہوں نے کہا کہ معلومات کی بروقت فراہمی کی وجہ سے تین انکاؤنٹر میں تین بڑے ماؤنواز مارے گئے۔ انہوں نے کہا کہ 120 نکسلیوں کو گرفتار کیا گیا ہے، جب کہ مختلف عہدوں پر فائز 32 نکسلیوں اور سی پی آئی (ماؤسٹ) کے دیگر کیڈروں نے خودسپردگی کی۔

ریڈی نے کہا کہ ٹیمیں تلنگانہ کے نکسل متاثرہ اضلاع اور چھتیس گڑھ اور مہاراشٹر کے سرحدی علاقوں میں تعینات کی گئیں اور ماؤنوازوں کے خلاف 83 آپریشن (76 تلنگانہ اور سات بین ریاستی آپریشن) کئے گئے۔ ان کا کہنا تھا کہ ان کارروائیوں میں مختلف قسم کا اسلحہ اور گولہ بارود، بارودی سرنگیں اور بم برآمد کیے گئے۔

انہوں نے پولیس سپرنٹنڈنٹ، پولیس کمشنر اور بین ریاستی سرحدی اضلاع کے پولیس اہلکاروں کی کوششوں کی تعریف کی۔ پولیس سربراہ نے کہا، "ہم نے اپنی کوششوں میں عام شہریوں کو بھی شامل کیا ہے تاکہ اس بات کو یقینی بنایا جا سکے کہ ماؤنوازوں کو پناہ نہ دی جائے۔ ہم نے لوگوں کو اپنی کوششوں میں شامل کرکے ان کا اعتماد حاصل کیا ہے۔

ڈی جی پی نے کہا کہ تلنگانہ میں جاریہ سال کے دوران کل جرائم میں 4.44 فیصد کا اضافہ ریکارڈ کیا گیا، جب کہ 2022 کے دوران کل 1,42,917 مقدمات درج ہوئے، جب کہ 2021 میں 1,36,841 مقدمات درج ہوئے۔ انہوں نے کہا کہ سائبر کرائم میں 57 فیصد اضافہ اس کا ذمہ دار ہے۔

ریڈی نے کہا کہ اس سال سائبر کرائم کے کل 13,895 معاملے درج کیے گئے جب کہ 2021 میں 8,839 معاملے درج ہوئے تھے۔ انہوں نے کہا کہ سزا سنانے کی شرح گزشتہ سال 50 فیصد کے مقابلے اس سال 56 فیصد ہو گئی ہے۔ انہوں نے کہا کہ اس سال خواتین کے خلاف جرائم کے 17,908 مقدمات درج ہوئے جبکہ 2021 میں 17,253 مقدمات درج ہوئے۔