جن آکروش یاترا راجستھان کی کانگریس حکومت کے خلاف غصہ ظاہر کرنے کا ایک ذریعہ ہے: گلاب چند کٹاریا

انہوں نے کہا کہ پچھلی بی جے پی حکومت نے اناپورنا اسکیم کے ذریعہ لوگوں کو کھانا فراہم کرنے کے انتظامات کئے تھے، جسے پہلے کانگریس حکومت نے روک دیا اور بعد میں اس کا نام اندرا رسوئی رکھ دیا گیا۔

بے روزگاری کو لے کر ریاستی حکومت کو نشانہ بناتے ہوئے بی جے پی لیڈر نے کہا کہ راجستھان بے روزگاری کے معاملے میں گزشتہ چار سالوں میں ملک میں پہلے اور دوسرے نمبر پر ہے۔ انہوں نے کہا کہ راجستھان میں بے روزگاری کی صورتحال اس قدر قابل رحم ہو چکی ہے کہ ریاست کے پڑھے لکھے نوجوان روزگار کی تلاش میں گھر گھر بھٹکنے پر مجبور ہیں۔

کٹاریہ نے کہا کہ کانگریس کے منشور میں کنٹراکٹ ورکرس کو مستقل کرنے کا وعدہ کیا گیا تھا، ساتھ ہی کنٹراکٹ ورکرس کو ریگولرائز کرنے کے لئے قانون بنانے کا وعدہ کیا گیا تھا، لیکن زمینی طور پر بہت سے کنٹراکٹ ورکرس کو اب بھی ان کی قابلیت کے مطابق اعزازیہ نہیں دیا جا رہا ہے۔

ریاست میں مرکزی اسکیموں کو نافذ نہ کرنے کا الزام لگاتے ہوئے انہوں نے کہا کہ چیف منسٹر اشوک گہلوت گزشتہ چار سالوں سے ریاست میں مرکزی حکومت کی اسکیموں کو لاگو نہیں کررہے ہیں۔ انہوں نے کہا کہ راجستھان کی کانگریس حکومت میں ترقیاتی کام صرف کاغذ پر ہو رہے ہیں، حقیقت میں زمینی سطح پر ترقی کی رفتار صفر ہے۔

انہوں نے کہا کہ راجستھان میں کانگریس کے دور حکومت میں کسانوں کی حالت بہت خراب رہی ہے، جہاں کسانوں کو ان کے زرعی کنکشن کے لیے ڈیمانڈ نوٹس جمع کرانے کے بعد بھی 6-6 ماہ تک کنکشن نہیں دیا جاتا، جب کہ بی جے پی حکومت کی طرف سے دی جانے والی بجلی کی سبسڈی بھی بند کردی گئی۔ انہوں نے دعویٰ کیا کہ راجستھان حکومت کی پالیسی کی وجہ سے بجلی کمپنیوں کا قرض 82 ہزار کروڑ تک پہنچ گیا ہے۔

کٹاریا نے کہا کہ خواتین کی عصمت دری میں راجستھان پہلے نمبر پر آیا ہے اور پچھلے تین سالوں میں ریاست میں عصمت دری کے واقعات میں سالانہ 36 فیصد اضافہ ہوا ہے۔

ریاست میں گینگ وار کے واقعات میں تیزی سے اضافہ ہونے کا دعویٰ کرتے ہوئے انہوں نے کہا کہ آج راجستھان کے ہر شہر میں چھوٹے گینگ پنپ رہے ہیں، کوئی بھی جرائم پیشہ گروہ پولیس کے تحفظ کے بغیر سرگرم نہیں ہو سکتا۔