ممبئی میں شیو سینا کے دفتر میں ادھو اور شندے کے دھڑوں میں جھڑپ ہوئی بی ایم سی پولیس نے مداخلت کی۔

ذرائع نے بتایا کہ شیو سینا (ادھو بالا صاحب ٹھاکرے) کے دھڑے کے سابق کونسلروں بشمول آشیش چیمبورکر اور سچن پڈوال نے ان کی موجودگی پر اعتراض کیا، جس کی وجہ سے گرما گرم بحث ہوئی۔

انہوں نے بتایا کہ تقریباً ایک گھنٹے تک کشیدگی کی صورتحال رہی اور پولیس کے پہنچنے سے قبل دونوں طرف کے کارکنوں نے نعرے بازی کی جس کے بعد سب کو دفتر سے ہٹا دیا گیا۔ دونوں دھڑوں نے کچھ رپورٹس کے برعکس دعویٰ کیا کہ پارٹی کے دفتر پر دعویٰ کرنے کی دونوں طرف سے کوئی کوشش نہیں کی گئی۔ میونسپل ہیڈ کوارٹر میں تمام بڑی سیاسی جماعتوں کے دفاتر گراؤنڈ فلور پر ہیں۔

شیوالے نے ‘پی ٹی آئی-بھاشا’ کو بتایا کہ وہ کوئی دعویٰ کرنے پارٹی دفتر نہیں گئے تھے، بلکہ میونسپل کمشنر سے ملاقات کے لیے بی ایم سی کی عمارت میں تھے۔ مہاراشٹر کے وزیر اور شندے دھڑے کے لیڈر دیپک کیسرکر نے ناگپور میں کہا کہ یہ دفتر شیو سینا کا ہے، اور ان کا دھڑا اصل شیو سینا ہے کیونکہ ان کے دعوے کو مہاراشٹر کی قانون ساز اسمبلی نے بھی قبول کر لیا ہے۔

انہوں نے کہا، ”انہیں (ٹھاکرے دھڑے) کو معلوم ہونا چاہیے کہ وہ پہلے ہی ہر جگہ اپنی اکثریت کھو چکے ہیں۔ انہیں یہ مان لینا چاہئے کہ انہوں نے بالا صاحب ٹھاکرے اور ہندوتوا کے نظریے کو چھوڑ دیا ہے اور وہ اقلیت میں ہیں۔