مولانا ابوالحقانی میدان خطابت کے بے تاج بادشاہ تھے : مولانا آل مصطفی مرکزی مظفرپوری

مولانا ابوالحقانی میدان خطابت کے بے تاج بادشاہ تھے

مولانا آل مصطفی مرکزی مظفرپوری

مظفرپور (پریس ریلیز) سرزمین محمد پور مبارک ،پوسٹ پرشوتم پور مادھوپورمظفرپوربہار میں حضرت علامہ ابوالحقانی علیہ الرحمہ کے وصال پر ایصال ثواب کی مجلس منعقد ہوئی قرآن خوانی کے بعد مولانا سلمان رضا غوثی نے حمد و نعت کے اشعار سنائے۔پھر مدرسہ اسلامیہ انوار العلوم ،سردار گنج، دلسنگھ ،سرائے سمستی پورکے پرنسپل حضرت مولانا آل مصطفی مرکزی مظفرپوری نے اپنی تقریر میں کہا کہ حافظ احادیث کثیرہ خطیب لاثانی حضرت علامہ محمد حسین ابو الحقانی علیہ الرحمہ اپنے اکابر کی یادگا ر اور نمونہ اسلاف تھے یوں تو آپ کو ہر فن میں ید طولیٰ حاصل تھا مگر میدان خطابت کے بے تاج بادشاہ تھے ۔

اصلاح و تذکیر آپ کی تقریر کا خاص عنوان ہوتا اورجو بات کہتے دل سے نکلتی اور دل پر اثر کرتی ۔آپ کے وصال سے ایک بڑا خلا پیدا ہوگیا جس کا پر ہونا مشکل ہے ۔حضرت مولانا جلال الدین رضوی بانی جامعہ حضرت مریم درگ نے کہا کہ آپ کی ذات دنیائے سنیت میں نہایت ممتاز اور معتبر تھی ۔

اسلام و سنیت کے فروغ اور مسلک رضا کی نشر واشاعت میں آپ کا کارنامہ آب زر سے لکھنے کے قابل ہے نہایت وسیع النظر عالم دین اور آفاقی ہونے کے باوجود ہر ایک سے بڑے پیار اور شفقت سے پیش آتے۔مولانا سلیم الزماں نوری کمہراری نے کہا کہ آپ کی پوری زندگی دعوت دین حق میں گزری ۔

آپ ہمہ جہت خوبیوں کے مالک تھے گویا اپنی ذات میں تنہا ایک تحریک ،ایک مشن اور ایک ادارہ تھے ۔یورپ و ایشیاء کے بیشتر ممالک آپ کی تبلیغ کی خوشبو سے معطر ہیں ۔حضرت مولانا غلام جیلانی جامعی دریاپوری نے کہا کہ آپ ایک خدا ترس صاحب تقویٰ عالم دین تھے۔آپ کی ذات ہر اعتبار سے بے مثالی تھی ۔آپ کی علمی ،دینی ،مذہبی اور سماجی خدمات کی ایک روشن تاریخ ہے آج یہ کہتے ہوئے کلیجہ منھ کو آرہا ہے کہ علم و فضل ،فکر و فن اور شعور و آگہی کا آسمان تہ ِخاک سو گیا ۔ مولانا ضیاء المصطفیٰ مدنی اورحافظ خوش دل رضا پورنیہ نے نقابت کے فرائض انجام دیئے ۔شہر کے معززین نے شریک ہو کر موصوف کی بلندی درجات کی دعا کی ۔اور صلوۃ و سلام پر محفل کا اختتام ہوا ۔