بی جے پی یوپی کے ریاستی صدر بھوپیندر سنگھ چودھری نے کہا کہ مین پوری اور کھٹولی کے نتائج توقعات کے مطابق نہیں تھے۔

انہوں نے کہا کہ ہم مینڈیٹ کا احترام کرتے ہیں اور جہاں ہماری توقع کے مطابق نتائج نہیں آئے ہم اس کا جائزہ لے کر آگے کی منصوبہ بندی کریں گے۔ چودھری نے منصفانہ انتخابات کرانے پر الیکشن کمیشن اور الیکشن میں شامل تمام اہلکاروں کا بھی شکریہ ادا کیا۔ انہوں نے کہا، "میں پارٹی کے تمام کارکنوں کو بھی مبارکباد دیتا ہوں، جنہوں نے پارٹی کے سرشار سپاہیوں کے طور پر انتخابات میں انتھک محنت کی۔”

سماج وادی پارٹی کی امیدوار ڈمپل یادو نے مین پوری پارلیمانی سیٹ پر اپنے قریبی حریف بی جے پی کے رگھوراج سنگھ شاکیا کو 2,88,461 ووٹوں کے بڑے فرق سے شکست دے کر جیت حاصل کی ہے۔ کھٹولی اسمبلی سیٹ پر آر ایل ڈی کے مدن بھیا نے اپنے حریف بی جے پی کی راج کماری سینی کو 22,000 سے زیادہ ووٹوں سے شکست دی۔

تاہم، بی جے پی امیدوار آکاش سکسینہ نے رام پور اسمبلی سیٹ پر ایس پی امیدوار عاصم رضا کو 33,702 ووٹوں کے فرق سے شکست دے کر جیت حاصل کی۔ یہ پہلا موقع ہے جب بی جے پی نے مسلم ووٹروں کی اکثریت والی رام پور صدر اسمبلی سیٹ پر کامیابی حاصل کی ہے۔

آکاش سکسینہ نے رام پور کے لوگوں کا شکریہ ادا کرتے ہوئے کہا، ”آزادی کے بعد پہلی بار بی جے پی نے رام پور اسمبلی سیٹ جیتی ہے۔ یہ سب کی حمایت، سب کے اعتماد اور سب کی کوشش کی پارٹی کی پالیسی پر عوام کی مہر ہے۔‘‘ چودھری نے گجرات اسمبلی انتخابات میں بی جے پی کی زبردست جیت کے لیے عوام اور بی جے پی کارکنوں کو مبارکباد دی۔ انہوں نے کہا کہ یہ عظیم فتح وزیر اعظم نریندر مودی اور قومی صدر جے پی نڈا کی موثر قیادت اور عوامی فلاح و بہبود اور گڈ گورننس کے لیے وزیر اعلی بھوپیندر پٹیل کے عزم کی جیت ہے۔

یہ بھی پڑھیں-